Գլուխ 5

   
1․ Ի կատարած վասն վիճակելոցն: Սաղմոս. Ե:

2․ Բանից իմոց ունկն դիր Տէր, եւ ի միտ առ զաղաղակ իմ:

3․ Նայեաց ի ձայն աղաւթից իմոց, թագաւոր իմ եւ Աստուած իմ:

4․ Ես զքեզ աղաչեմ Տէր, ընդ առաւաւտս լուիցես ձայնի իմում.

5․ ընդ առաւաւտս պատրաստ եղէց յանդիման լինել քեզ: Ոչ թէ դու Աստուած կամիս զանաւրէնութիւն,

6․ եւ ոչ բնակեն առ քեզ չարք, մի անաւրէնք բնակեսցեն առաջի աչաց քոց:

7․ Ատեցեր զայնոսիկ որ գործեն զանաւրէնութիւն. կորուսանես զամենեսեան ոյք խաւսին սուտ: Զայր արիւնահեղ եւ նենգաւոր պիղծ առնես դու Տէր,

8․ այլ ես` ըստ բազում ողորմութեան քում մտից ի տուն քո. երկիրպագից ի տաճար սուրբ քո երկիւղիւ քո:

9․ Տէր առաջնորդեա ինձ յարդարութեան քում. վասն թշնամեաց իմոց ուղիղ արա առաջի իմ զճանապարհս քո:

10․ Զի ոչ գոյ ի բերանս նոցա ճշմարտութիւն, եւ սիրտք նոցա նանրեալք են:

11․ Որպէս գերեզման բաց է կոկորդ նոցա. լեզուաւք իւրեանց նենգաւորք եղեն: Դատեա զնոսա Աստուած զի անկցին ի խորհրդոց իւրեանց. ըստ բազում ամպարշտութեան նոցա մերժեա զնոսա` զի դառնացուցին զքեզ:

12․ Ուրախ լիցին ամենեքեան ոյք յուսացեալ են ի քեզ, յաւիտեան ցնծասցեն, եւ բնակեսցես դու ի նոսա: Պարծեսցին ի քեզ սիրելիք անուան քոյ.

13․ զի աւրհնեսցես դու զարդարն. Տէր որպէս զինու հաճութեամբ քով պսակեցեր զմեզ: Տունք. ժբ: