Գլուխ 32

Սաղմոս ի Դաւիթ.
 
1. Ցնծացէք արդարք ի Տէր` ուղղոց վայելէ աւրհնութիւն,

2. խոստովան եղերուք Տեառն աւրհնութեամբ. տասնաղեաւ սաղմոսարանաւ սաղմոս ասացէք նմա:

3. Աւրհնեցէք զՏէր յաւրհնութիւն նոր զի բարի է, սաղմոս ասացէք նմա աւրհնութեամբ:

4. Ուղիղ են պատգամք Տեառն, եւ ամենայն ճանապարհք նորա հաւատովք են,

5. եւ սիրէ զողորմութիւն եւ զիրաւունս Տէր: Ողորմութեամբ Տեառն լի եղեւ երկիր,

6. եւ բանիւ Տեառն երկինք հաստատեցան, եւ հոգւով բերանոյ նորա ամենայն զաւրութիւնք նոցա:

7. Ժողովեաց որպէս ի տիկ զջուրս ծովու, եւ դնէ ի խոր զգանձս իւր:

8. Երկիցէ ի Տեառնէ ամենայն երկիր, եւ ի նմանէ դողասցեն ամենայն բնակիչք աշխարհի:

9. Նա ասաց եւ եղեն, ինքն հրամայեաց` եւ հաստատեցան:

10. Տէր ցրուէ զխորհուրդս հեթանոսաց, անարգէ Տէր զխորհուրդս ժողովրդոց, եւ արհամարհէ Տէր զխորհուրդս իշխանաց:

11. Խորհուրդ Տեառն յաւիտեան մնայ, խորհուրդ սրտի նորա ազգէ մինչչեւ յազգ:

12. Երանի ազգի որոյ Տէր Աստուած աւգնական է նմա. ժողովուրդ զոր ընտրեաց ի ժառանգութիւն իւր:

13. Յերկնից նայեցաւ Տէր յամենայն որդիս մարդկան,

14. ի պատրաստ բնակութենէ իւրմէ հայեցաւ յամենայն բնակիչս աշխարհի:

15. Ո ստեղծ առանձին զսիրտս նոցա եւ ի միտ առնու զամենայն գործս նոցա:

16. Ոչ թէ ի բազում զաւրս իւր ապրեսցի թագաւոր, եւ ոչ սկայ ի բազում զաւրութեան իւրում:

17. Սուտ է ձի ի փրկութեան իւրում. ի բազում զաւրութեան իւրում ոչ ապրեցուցանէ զհեծեալն:

18. Աչք Տեառն ի վերայ երկիւղածաց իւրոց, եւ ոյք յուսան յողորմութիւն նորա:

19. Փրկել ի մահուանէ զանձինս նոցա. կերակրել զնոսա ի սովի:

20. Անձինք մեր համբերեսցեն Տեառն, զի աւգնական եւ պաշտպան մեր է:

21. Ի նա ուրախ եղիցին սիրտք մեր, եւ յանուն սուրբ նորա յուսասցուք:

22. Եղիցի ողորմութիւն քո Տէր ի վերայ մեր, որպէս յուսացաք ի քեզ: Տունք. ժթ: