Գլուխ 44

   
1․ Ի կատարած. զառանցելոց ժամանակաց, որդւոցն Կորխայ իմաստութեան. Սաղմոս աւրհնութեան վասն սիրելւոյն: ԽԴ:

2․ Բղխեսցէ սիրտ իմ զպատգամս քո բարիս, եւ ասացից զգործս իմ թագաւորի: Լեզու իմ որպէս գրիչ արագագիր դպրի,

3․ գեղեցիկ տեսանելով քան զամենայն որդիս մարդկան: Սփռեցան շնորհք ի շրթանց քոց. վասն այնորիկ աւրհնեաց զքեզ Աստուած յաւիտեան:

4․ Ած զսուր ընդ մէջ քո հզաւր,

5․ վայելչութիւն գեղոյ քոյ: Լարեա ուղղեա եւ թագաւորեա` վասն ճշմարտութեան հեզութեան եւ արդարութեան, եւ առաջնորդեսցէ քեզ սքանչելապէս աջ քո:

6․ Նետք քո սրեալ են հզաւր, եւ ժողովուրդք ի ներքոյ քոյ անկցին, ի սիրտս թշնամեաց թագաւորի:

7․ Աթոռ քո Աստուած յաւիտեանս յաւիտենից, գաւազան ուղղութեան գաւազան արքայութեան քոյ:

8․ Սիրեցեր զարդարութիւն, եւ ատեցեր զանաւրէնութիւն: Վասն այսորիկ աւծ զքեզ Աստուած Աստուած քո իւղով ուրախութեամբ, առաւել քան զընկերս քո:

9․ Զմուռս եւ ստշախն եւ կասիա ի զգեստէ քումմէ, ի տաճարաց փղոսկրէից, ուստի ուրախ արարին զքեզ

10․ դստերք թագաւորաց ի պատիւ քո: Կացցէ դշխոյ ընդ աջմէ քումմէ, ի հանդերձս ոսկեհուռն զարդարեալ եւ պաճուճեալ:

11․ Լուր դուստր եւ տես` խոնարհեցո զունկն քո. մոռա զժողովուրդ քո եւ զտուն հաւր քոյ.

12․ զի ցանկացաւ թագաւոր գեղոյ քոյ: Սա ինքն է Տէր քո` երկիր պագցես սմա, եւ դուստր Ծուրայ երկիր պագցէ սմա. եւ պատարագաւք

13․ զերեսս սորա պաշտեսցեն մեծամեծք ժողովրդոց:

14․ Ամենայն փառք դստեր թագաւորի ի ներքոյ, ի վերջաւորս ոսկեհուռն

15․ զարդարեալ եւ պաճուճեալ: Տարցին թագաւորի կուսանք զհետ նորա, եւ զընկերս նորա տարցին նմա:

16․ Ածցեն ցնծութեամբ եւ ուրախութեամբ եւ տարցին ի տաճար թագաւորի,

17․ եւ փոխանակ հարց քոց եղիցին որդիք քո: Կացուսցես զնոսա իշխանս ընդ ամենայն երկիր,

18․ յիշեսցի անուն քո ընդ ամենայն ազգս ազգաց: Վասն այսորիկ ժողովուրդք խոստովան եղիցին առ քեզ, յաւիտեան` եւ յաւիտեանս յաւիտենից: Տունք. ժը: