Գլուխ 47

   
1. Սաղմոս աւրհնութեան որդւոցն Կորխայ. երկրորդ շաբաթու. ԽԷ:

2. Մեծ է Տէր, եւ աւրհնեալ է յոյժ, ի քաղաք Աստուծոյ մերոյ, ի լեառն սուրբ նորա:

3. Հաստարմատ ցնծասցէ ցնծութեամբ ամենայն երկիր. լերինք Սիոնի կողմանք հիւսւսոյ` քաղաք թագաւորի մեծի:

4. Աստուած ի տաճարի իւրում յայտնի, ի ժամանակի որպէս աւգնական լինէր նոցա:

5. Ահաւասիկ թագաւորութիւնք երկրի ժողովեցան, եւ անցին ի միասին:

6. Ինքեանք տեսին այսպէս եւ զարմացան, խռովեցան սասանեցան,

7. եւ դողումն կալաւ զնոսա:

8. Անդ երկունք որպէս ի ծննդեան, ի հողմ սաստիկ փշրեսցէ զնաւս ի թարսիս:

9. Որպէս լուաք` սոյնպէս եւ տեսաք, ի քաղաք Տեառն զաւրութեանց ի քաղաք Աստուծոյ մերոյ: Աստուած հիմունս արկ նմա յաւիտեան.

10. ընկալաք Աստուած զողորմութիւն քո ի մէջ ժողովրդեան քոյ: Հանգիստ:

11. Ըստ անուան քում սոյնպէս եւ աւրհնութիւն քո ընդ ամենայն տիեզերս, արդարութեամբ լի է աջ քո:

12. Ուրախ եղիցի լեառն Սիոն, եւ ցնծասցեն դստերք Յուդայ, վասն իրաւանց քոց Տէր:

13. Շրջեցարուք զՍիովնիւ պաշարեցէք զնա, եւ պատեցէք զաշտարակս նորա:

14. Դիք զսիրտս ձեր ի վերայ զաւրութեանց նորա, բաժանեցէք զամուրս նորա, զի պատմել կարասջիք յազգ յայլ:

15. Սա է Աստուած Աստուած մեր յաւիտեանս յաւիտենից, եւ սա հովուեսցէ զմեզ մինչչեւ յաւիտեան: Տունք. ժգ: