Գլուխ 83

   
1. Ի կատարած. վասն հնձանաց. որդւոցն Կորխայ Սաղմոս. ՁԳ: Որպէս սիրելի են յարկք քո Տէր զաւրութեանց,

2. ցանկայ եւ փափագէ անձն իմ ի գաւիթս քո:

3.Սիրտ իմ եւ մարմին իմ` ցնծասցեն առ Աստուած կենդանի:

4. Քանզի ճնճղուկ եգիտ իւր տուն, եւ տատրակ զբոյն ուր դիցէ զձագս իւր: Սեղան քո Տէր զաւրութեանց, թագաւոր իմ եւ Աստուած իմ:

5. Երանի ամենեցուն որ բնակեալ են ի տան Տեառն, յաւիտեանս յաւիտենից աւրհնեսցեն զքեզ:

6. Երանեալ է այր որոյ աւգնութիւն իւր ի քէն է. ելս եդ ի մտի իւրում

7. ի հովտէս տրտմութեան ի տեղւոջ յորում ուխտեաց:

8. Զաւրհնութիւն ստասցի որ զաւրէնս դնէ, գնասցէ նա ի զաւրութենէ ի զաւրութիւն, եւ երեւեսցի Աստուած հրեշտակաց ի Սիովն:

9. Տէր Աստուած զաւրութեանց լուր աղաւթից իմոց, ունկն դիր Աստուած Յակովբայ:

10. Ընդունելի ես դու մեր, տես Աստուած եւ նայեա յերեսս աւծելոյ քոյ:

11. Վասն զի լաւ է ինձ մի աւր ի գաւիթս քո, քան զհազարս: Ընտրեցի ընդ աղբ գալ ի տան Աստուծոյ, առաւել քան զբնականալ ի յարկս մեղաւորաց:

12. Զողորմութիւն եւ զճշմարտութիւն սիրէ Տէր Աստուած, զշնորհս եւ զփառս տացէ:

13. Տէր ոչ պակաս առնէ զողորմութիւն իւր յայնցանէ, որ գնան յանբծութեան: Տէր Աստուած զաւրութեանց երանեալ է այր որ յուսայ ի քեզ: Տունք. ժդ: