Գլուխ 85

Սաղմոս ի Դաւիթ. աղաւթք. ՁԵ:

 

1. Խոնարհեցո Տէր զունկն քո եւ լուր ինձ. զի աղքատ եւ տնանկ եմ ես:

2. Պահեա զանձն իմ զի սուրբ եմ ես. փրկեա զծառայս քո Աստուած իմ որ ի քեզ յուսացայ:

3. Ողորմեա ինձ Տէր զի առ քեզ աղաղակեցի զաւրհանապազ,

4. ուրախ արա զանձն ծառայի քոյ, զի առ քեզ Տէր համբարձի զանձն իմ:

5. Զի դու Տէր քաղցր եւ ուղիղ ես. բազումողորմ առ ամենեսեան որ կարդան առ քեզ:

6. Ունկն դիր Տէր աղաւթից իմոց, եւ նայեա ի ձայն խնդրուածոց իմոց:

7. Յաւուր նեղութեան իմոյ կարդացի առ քեզ, եւ լուար ինձ:

8. Ոչ ոք է նման քեզ յԱստուածս Տէր, եւ ոչ ոք է որպէս զգործս քո:

9. Զամենայն ազգս զոր արարեր` եկեսցեն եւ երկիր պագցեն առաջի քո, փառաւոր արասցեն զանուն քո յաւիտեան:

10. Մեծ ես դու Տէր եւ առնես սքանչելիս, եւ դու միայն ես Աստուած:

11. Առաջնորդեա ինձ ի ճանապարհի քում, եւ գնացից ի ճշմարտութեան քում, եւ ուրախ եղիցի սիրտ իմ` երկնչել յանուանէ քումմէ:

12. Խոստովան եղէց առ քեզ Տէր Աստուած իմ բոլորով սրտիւ իմով. փառաւոր արարից զանուն քո յաւիտեան:

13. Մեծ եղեւ ի վերայ իմ ողորմութիւն քո, փրկեցեր զանձն իմ ի դժոխոց ներքնոց Աստուած:

14. Անաւրէնք յարեան ի վերայ իմ, եւ ժողովք հզաւրաց խնդրեցին զանձն իմ, եւ ոչ համարեցան զքեզ Աստուած առաջի իւրեանց:

15. Այլ դու Տէր Աստուած իմ գթած ես եւ ողորմած, երկայնամիտ բազումողորմ եւ ճշմարիտ,

16. նայեա առիս եւ ողորմեա ինձ: Տուր զաւրութիւն ծառայի քոյ, կեցո զորդի աղախնոյ քոյ,

17. եւ արա առ իս նշան բարութեան: Տեսցեն ատելիք իմ եւ ամաչեսցեն, զի դու Տէր աւգնեցեր ինձ եւ մխիթարեցեր զիս: Տունք. ժզ: