Գլուխ 73

Իմաստութիւն յԱսափ. ՀԳ:

 

1. Ընդէ՞ր մերժեցեր Աստուած ի սպառ. բարկացաւ սրտմտութիւն քո ի վերայ խաշին արաւտի քոյ:

2. Յիշեա զժողովուրդ քո զոր ստացար ի սկզբանէ. փրկեցեր զվիճակ ժառանգութեան քոյ: Լեառն Սիոն այս որ բնակեցեր դու ի սմա.

3. համբարձ զձեռն քո ի վերայ ամբարտաւանութեան նոցա ի սպառ: Որ ինչ անիրաւեցաւ թշնամին ի սրբութեան քում,

4. պարծեցան ատելիք քո ի մէջ բարեկենդանութեան քոյ:

5. Եդին զնշանս իւրեանց ի նշանս. եւ ինքեանք ոչ ծանեան զելս ի վերուստ: Որպէս յանտառի փայտատաւք

6. կոտորեցին զդրունս նորա, ի միասին փայտատաւք եւ մրճովք կործանեցին զնա:

7. Այրեցին ի հուր զսրբութիւն քո. յերկրի պղծեցին զխորան անուան քոյ:

8. Ասացին ի սիրտս իւրեանց ազգ նոցա ի միասին, եկայք լռեցուսցուք զամենայն տաւնս Աստուծոյ յերկրէ:

9. Նշանս մեք ինչ ոչ տեսաք, եւ ոչ եւս գուցէ մարգարէ. եւ զմեզ ինչ ոք ոչ ճանաչիցէ:

10. Մինչչեւ յե՞րբ Աստուած նախատէ թշնամին, բարկացուցանէ հակառակորդն զանուն սուրբ քո:

11. Ընդէ՞ր դարձուցանես զձեռն քո, եւ զաջ քո ի միջոյ ծոցոյ քումմէ ի սպառ:

12. Աստուած թագաւոր մեր յառաջ քան զյաւիտեանս, որ արարեր զփրկութիւն ի մէջ երկրի:

13. Դու հաստատեցեր զաւրութեամբ քով զծով. դու խորտակեցեր զգլուխս վիշապաց ի վերայ ջուրց:

14. Դու փշրեցեր զգլուխ վիշապին, եւ ետուր զնա կերակուր զաւրացն հնդկաց:

15. Դու բղխեցուցեր զաղբեւրս եւ զվտակս, դու ցամաքեցուցեր զգետս սաստիկս:

16. Քո է տիւ եւ քո է գիշեր, զլոյս եւ զարեւ դու հաստատեցեր.

17. եւ դու հաստատեցեր զամենայն սահմանս երկրի. զգարուն եւ զամառն դու ստեղծեր:

18. Այս յուշ լիցի քեզ զի թշնամին նախատեաց զՏէրդ. ժողովուրդ անզգամ բարկացոյց զանուն սուրբ քո:

19. Մի մատներ գազանաց զանձն որ խոստովան առնի առ քեզ, եւ զանձինս տնանկաց քոց մի մոռանար ի սպառ:

20. Հայեա յուխտ քո` զի լցան տունք ափշելոց յերկրի անիրաւութեամբ:

21. Մի դարձցի տնանկն ամաչեցեալ. այլ աղքատն եւ տնանկ աւրհնեսցեն զանուն սուրբ քո:

22. Արի Աստուած եւ դատեա զդատաստանս քո. յիշեա զնախատինս որ յանզգամէն զաւրհանապազ:

23. Մի մոռանար զձայն պաշտաւնէից քոց. ամբարտաւանութիւն ատելեաց քոց վերասցի հանապազ: Տունք. իբ: Գոբղայս. խզ: