Ալէլուիա. ՃԴ:
1․ Խոստովան եղերուք Տեառն` եւ կարդացէք զանուն նորա. պատմեցէք ի հեթանոսս զգործս նորա:
2․ Աւրհնեցէք եւ սաղմոս ասացէք նմա. պատմեցէք զամենայն սքանչելիս նորա,
3․ եւ գովեցարուք յանուն սուրբ նորա: Ուրախ եղիցին սիրտք այնոցիկ ոյք խնդրեն զՏէր,
4․ խնդրեցէք զՏէր եւ հզաւրք եղերուք, խնդրեցէք զերեսս նորա յամենայն ժամ:
5․ Յիշեցէք զսքանչելիս նորա զոր արար, զարուեստս եւ զիրաւունս բերանոյ նորա:
6․ Զաւակն աբրահամեան ծառայք նորա, որդիք Յակովբայ ընտրեալք նորա:
7․ Նա ինքն է Տէր Աստուած մեր, յամենայն երկրի են իրաւունք նորա:
8․ Յիշեաց յաւիտենից զուխտ իւր, եւ զբանն զոր պատուիրեաց մինչչեւ ի հազար ամ:
9․ Զուխտն զոր եդ ընդ Աբրահամու, եւ զերդումն իւր ընդ Սահակայ:
10․ Հաստատեաց առ Յակովբ զհրաման իւր, եւ առ Իսրայէլ զուխտ իւր յաւիտենից:
11․ Ասէ` ձեզ տաց զերկիրն Քանանու, զվիճակ ժառանգութեան ձերոյ:
12․ Զի էին նոքա թուով սակաւ, նուազք եւ պանդուխտք ի նմա:
13․ Անցին նոքա ազգէ յազգ, ի թագաւորութենէ ի ժողովուրդ յայլ:
14․ Ոչ եթող մարդկան մեղանչել նոցա, կշտամբեաց զթագաւորս վասն նոցա:
15․ Մի մերձենայք ասէ յաւծեալս իմ, եւ ի մարգարէս իմ մի մեղանչէք:
16․ Կոչեաց սով յերկիր նոցա, զամենայն զաւրութիւն հացի եբեկ:
17․ Առաքեաց առաջի նոցա այր, ի ծառայութիւն վաճառեցաւ Յովսէփ:
18․ Խոնարհ արարին ի կապանս զոտս նորա, եւ անց ընդ երկաթս անձն նորա:
19․ Մինչչեւ եկեսցէ բան նորա, եւ բան Տեառն փորձեաց զնա:
20․ Առաքեաց թագաւորն եւ ելոյծ զնա, իշխան ժողովրդեան եթող զնա:
21․ Կացոյց զնա Տէր տան իւրոյ, իշխան ի վերայ ամենայն ստացուածոց իւրոց:
22․ Խրատել զիշխանս նոցա որպէս զինքն, եւ զծերս նոցա իմաստունս արասցէ:
23․ Եմուտ Իսրայէլ յԵգիպտոս, Յակովբ պանդխտեցաւ յերկիր Քամայ:
24․ Աճեցոյց զժողովուրդ իւր յոյժ, եւ զաւրացոյց զնոսա քան զթշնամիս իւր:
25․ Դարձոյց զսիրտս նոցա ատել զժողովուրդ իւր, եւ ի նենգել զծառայս իւր:
26․ Առաքեաց զՄովսէս ծառայ իւր, եւ զԱհարովն ընտրեալ իւր:
27․ Ետ նոցա զբան նշանաց իւրոց, եւ զարուեստս իւր յերկիր Քամայ:
28․ Առաքեաց խաւար եւ խաւարեցոյց զնոսա, զի դառնացուցին զբան նորա:
29․ Դարձոյց յարիւն զգետս նոցա, եւ սպան զամենայն ձկունս նոցա:
30․ Եռաց յերկիր նոցա գորտ, ի շտեմարանս թագաւորաց նոցա:
31․ Ասաց եւ եկն շանաճանճ, եւ մժիխ ընդ ամենայն սահմանս նոցա:
32․ Դարձոյց զանձրեւս նոցա ի կարկուտ, եւ հուր յերկիր նոցա բորբոքեցաւ:
33․ Եհար զայգիս եւ զթզենիս նոցա, եւ փշրեաց զամենայն ծառս սահմանաց նոցա:
34․ Ասաց եւ եկն մարախ, եւ խառնիճ` զի ոչ գոյր թիւ:
35․ Եկեր զամենայն խոտ երկրի նոցա, սպառեաց զամենայն պտուղ անդոյ նոցա:
36․ Եհար զամենայն անդրանիկս եգիպտացւոց, զսկիզբն ամենայն վաստակոյ նոցա:
37․ Եհան զնոսա ոսկւով եւ արծաթով, եւ ոչ գոյր յազգի նոցա հիւանդ:
38․ Ուրախ եղեւ Եգիպտոս ընդ ելանել նոցա, զի անկաւ ահ Տեառն ի վերայ նոցա:
39․ Սփռեաց ամպ հովանի առնել նոցա ի տուէ, եւ հրով լոյս տայր նոցա ի գիշերի:
40․ Խնդրեցին եւ եկն լորամարգի, եւ հացիւ երկնից լցոյց զնոսա:
41․ Եհար զվէմն եւ բղխեցին ջուրք, եւ գնացին գետք ընդ անջրդիս:
42․ Յիշեաց զբան իւր սուրբ, որ ընդ Աբրահամու ծառայի իւրում:
43․ Եհան զժողովուրդ իւր ցնծութեամբ, եւ զընտրեալս իւր ուրախութեամբ:
44․ Ետ նոցա զգաւառս հեթանոսաց, ի վաստակս ժողովրդոց ժառանգեցոյց զնոսա:
45․ Զի պահեսցեն զվկայութիւնս նորա, եւ զաւրէնս նորա խնդրեսցեն: Տունք. խդ: Գոբղայս. հը:
Հաղորդում կայքում սխալի վերաբերյալ
Տվյալ հատվածում առկա է սխալ: