Գլուխ 18

 
1․ Ի կատարած. Սաղմոս ի Դաւիթ. ԺԸ:

2․ Երկինք պատմեն զփառս Աստուծոյ, եւ զարարածս ձեռաց նորա պատմէ հաստատութիւն:

3․ Աւր` աւուր բղխէ զբան. եւ գիշեր` գիշերի ցուցանէ զգիտութիւն:

4․ Ոչ են բանք եւ ոչ են խաւսք, որոց ոչ լսին ձայնք նոցա:

5․ Ընդ ամենայն երկիր ել բարբառ նոցա, մինչչեւ ի ծագս աշխարհի են խաւսք նոցա:

6․ Յարեւու եհար զխորան իւր, եւ ինքն որպէս փեսայ զի ելանէ յառագաստէ իւրմէ, ցնծայ նա որպէս սկայ յընթանալ զճանապարհս իւր:

7․ Ի ծագաց երկնից են ելք նորա, հանգիստ նորա մինչչեւ ի ծագս նորուն. եւ ոչ ոք իցէ որ թաքիցէ ի տապոյ նորա:

8․ Աւրէնք Տեառն անբիծ են եւ դարձուցանեն զհոգիս. վկայութիւն Տեառն հաւատարիմ, եւ իմաստուն առնէ զտղայս:

9․ Արդարութիւն Տեառն ուղիղ է եւ ուրախ առնէ զսիրտս, պատուիրանք Տեառն լոյս են եւ լոյս տան աչաց. երկեւղ Տեառն սուրբ, եւ մնայ յաւիտեան:

10․ Դատաստանք Տեառն ճշմարիտ են, եւ արդար է նոյն:

11․ Ցանկալի է նա քան զոսկի` եւ քան զականս պատուականս բազումս. քաղցր է նա քան զմեղու խորիսխ:

12․ Քանզի ծառայ քո պահեսցէ զայս, ի պահել նմա հատուցումն բազում:

13․ Զյանցուածս իւր ո՞վ կարէ առնուլ ի միտ. ի գաղտնեաց իմոց սուրբ արա զիս Տէր,

14․ եւ յաւտարէ պահեա զծառայս քո: Ապա թէ ոչ տիրեսցեն ինձ, յայնժամ անբիծ եղէց, եւ սուրբ եղէց ի մեղաց մեծաց:

15․ Եղիցին քեզ հաճոյ բանք բերանոյ իմոյ, եւ խորհուրդք սրտի իմոյ առաջի քո յամենայն ժամ. Տէր աւգնական իմ եւ փրկիչ իմ: Տունք. ժդ: