1․ Սաղմոս ի Դաւիթ. աւրհնութեանց նաւակատեաց տաճարին. ԻԸ:
Մատուցէք Տեառն որդիք Աստուծոյ, մատուցէք Տեառն զորդիս խոյոց:
2․ Մատուցէք Տեառն զփառս եւ զպատիւ, մատուցէք Տեառն զփառս անուան նորա. եւ երկիր պագէք Տեառն ի սրահ սրբութեան նորա:
3․ Ձայն Տեառն ի վերայ ջուրց, եւ Աստուած փառաւք որոտաց, եւ Տէր ինքն ի վերայ ջուրց բազմաց:
4․ Ձայն Տեառն զաւրութեանց, եւ ձայն Տեառն մեծ վայելչութեանց:
5․ Ձայն Տեառն փշրէ զմայրս. եւ մանրէ Տէր զմայրսն Լիբանանու:
6․ Մանրեսցէ զնոսա որպէս զմատաղատունկն Լիբանանու, որ սիրելին է որպէս զորդիս միեղջերոյ:
7․ Ձայն Տեառն հատանէ զբոց հրոյ.
8․ ձայն Տեառն շարժէ զանապատն, եւ խռովեցուցանէ Տէր զանապատն կադէս:
9․ Ձայն Տեառն հաստատէ զեղջերուս, եւ յայտնի առնէ զանտառս: Ի տաճարի նորա ամենայն որ ասեն զփառս նորա:
10․ Տէր զջրհեղեղս զնստուցանէ եւ ցածուցանէ, թագաւորեսցէ Տէր յաւիտեան:
11․ Տէր զաւրութիւն ժողովրդեան իւրոյ տացէ, եւ աւրհնեսցէ զժողովուրդ իւր ի խաղաղութիւն: Տունք. ժա:
Հաղորդում կայքում սխալի վերաբերյալ
Տվյալ հատվածում առկա է սխալ: