Գլուխ 50

   
1. Ի կատարած. Սաղմոս ի Դաւիթ.

2. ի ժամանակի զի եկն առ նա Նաթան մարգարէ, իբրեւ զի մտեալ էր նա առ Բերսաբէէ. Ծ:

3. Ողորմեա ինձ Աստուած ըստ մեծի ողորմութեան քում. ըստ բազում գթութեան քում քաւեա զանաւրէնութիւնս իմ:

4. Առաւել լուա զիս յանաւրէնութենէ իմմէ. եւ ի մեղաց իմոց սուրբ արա զիս:

5. Զանաւրէնութիւնս իմ ես ինձէն գիտեմ, եւ մեղք իմ առաջի իմ են յամենայն ժամ:

6. Քեզ միայն մեղայ Տէր, եւ չար առաջի քո արարի: Որպէս արդար եղիցես ի բանս քո, եւ յաղթաւղ ի դատել քեզ:

7. Անաւրէնութեամբ յղացաւ, եւ ի մեղս ծնաւ զիս մայր իմ:

8. Դու Տէր զճշմարտութիւն սիրեցեր, զանյայտս եւ զծածկեալս իմաստութեամբ քով յայտնեցեր ինձ:

9. Ցաւղեա յիս մշտկաւ եւ սուրբ եղէց, լուա եւ քան զձիւն սպիտակ եղէց:

10. Լսելի արա ինձ ցնծութիւն եւ ուրախութիւն, եւ ցնծասցեն ոսկերք իմ տառապեալք:

11. Դարձո զերեսս քո ի մեղաց իմոց. զամենայն անաւրէնութիւնս իմ քաւեա յինէն:

12. Սիրտ սուրբ հաստեա յիս Աստուած, եւ հոգի ուղիղ նորոգեա ի փորի իմում:

13 Մի ընկենուր զիս Տէր յերեսաց քոց, եւ զհոգի սուրբ քո մի հաներ յինէն:

14. Տուր ինձ ցնծութիւն փրկութեան, հոգւով պետութեամբ քով հաստատեա զիս:

15. Ուսուցից անաւրինաց զճանապահս քո, եւ ամպարիշտք առ քեզ դարձցին:

16. Փրկեա զիս յարենէ Աստուած Աստուած փրկութեան իմոյ. ցնծասցէ լեզու իմ յարդարութեան քում:

17. Տէր եթէ զշրթունս իմ բանաս, բերան իմ երգեսցէ զաւրհնութիւնս քո:

18. Թէ կամեցեալ էիր պատարագս մատուցանէաք. բայց դու ընդ ողջակէզս իսկ ոչ հաճեցար:

19. Պատարագ Աստուծոյ հոգի խոնարհ, զսիրտ սուրբ եւ զհոգի խոնարհ Աստուած ոչ արհամարհէ:

20. Բարի արա Տէր կամաւք քովք Սիոնի, եւ շինեսցին պարիսպք Երուսաղէմի:

21. Յայնժամ հաճեսցիս ընդ պատարագս արդարութեան. ուխտից պատարագս հանցեն ի սեղան քո զուարակս: Տունք. ի: