Գլուխ 61

   
1. Ի կատարած. ի վերայ Իդիթովմայ. Սաղմոս ի Դաւիթ. ԿԱ:

2. Բայց միայն Աստուծոյ հնազանդ լեր անձն իմ, զի ի նմանէ է ինձ փրկութիւն:

3. Նա է Աստուած իմ եւ փրկիչ իմ. ապաւէն իմ զի մի սասանեցայց առաւել:

4. Մինչչեւ յե՞րբ յառնէք ի վերայ մարդոյ` սպանանել ամենեքեան. որպէս զորմոյ թիւրելոյ` եւ զցանգոյ մերժելոյ:

5. Բայց միայն զպատիւ իմ խորհեցան մերժել յինէն, եւ ընթացան ի ծարաւս իւրեանց: Բերանաւք իւրեանց աւրհնէին, եւ սրտիւք իւրեանց անիծանէին:

6. Բայց սակայն Աստուծոյ հնազանդ լեր անձն իմ, զի ի նմանէ է ինձ համբերութիւն:

7. Նա է Աստուած իմ եւ փրկիչ իմ, ապաւէն իմ զի մի սասանեցայց:

8. Յաստուծոյ է զաւրութիւն իմ եւ փառք իմ. Աստուած աւգնութեան իմոյ, յոյս իմ է առ Աստուած:

9. Յուսացարուք ի նա ամենայն ժողովք ժողովրդոց, սփռեցէք առաջի նորա զսիրտս ձեր, զի Աստուած աւգնական է մեր յաւիտեանս ժամանակաց: Հանգիստ:

10. Սակայն ընդունայն են որդիք մարդկան, սուտ են որդիք մարդկան, ի կշիռս իւրեանց մեղանչեն, եւ ինքեանք յունայնութեան են ի միասին:

11. Մի յուսայք յանիրաւութիւն, եւ յափշտակութեան մի ցանկայք. մեծութիւն թէ առիւ գայցէ, մի յաւժարեսցին սիրտք ձեր:

12. Միանգամ խաւսեցաւ Աստուած, եւ երկուս զայս լուաք: Յաստուծոյ է զաւրութիւն.

13. եւ քո Տէր ողորմութիւն. եւ դու հատուցանես իւրաքանչիւր ըստ գործս նոցա: Տունք. ժգ: