Գլուխ 7

   
1. Սաղմոս ի Դաւիթ. զոր ասաց Տեառն վասն բանին Քուսեայ որդւոյ Յիմենայ. Է:

2. Տէր Աստուած իմ ի քեզ յուսացայ եւ փրկեա զիս, յամենայն հալածչաց իմոց ապրեցո զիս:

3. Գուցէ երբէք յափշտակիցէ որպէս առեւծ զանձն իմ, ոչ ոք իցէ որ փրկիցէ, եւ ոչ այն որ ապրեցուցանէ:

4. Տէր Աստուած իմ թէ արարից զայս, թէ իցեն անաւրէնութիւնք ի ձեռս իմ:

5. Թէ հատուցի երբէք այնոցիկ ոյք հատուցին ինձ չար. անկայց եւ ես ի թշնամեաց իմոց ընդունայն:

6. Հալածեսցէ ապա թշնամին զանձն իմ. հասցէ կոխեսցէ յերկիր զկեանս իմ, եւ փառս իմ ի հող բնակեցուսցէ:

7. Արի Տէր բարկութեամբ քով, եւ բարձր լեր ի սպառել թշնամեաց իմոց: Զարթիր Տէր Աստուած իմ ի հրամանս քո զոր պատուիրեցեր,

8. եւ ժողովք ժողովրդոց շուրջ եղիցին զքեւ: Վասն այսորիկ ի բարձունս դարձ Տէր.

9. եւ Տէր դատի զժողովուրդս իւր: Դատ արա ինձ Տէր ըստ արդարութեան իմում. ըստ անբծութեան իմում որ յիս:

10. Կատարեսցին չարիք ի վերայ մեղաւորաց, եւ յաջողեսցես դու արդարոյն: Որ քննէ զսիրտս եւ զերիկամունս Աստուած արդար. յիրաւի է

11. աւգնութիւն ինձ յԱստուծոյ` որ ապրեցուցանէ զայնոսիկ, որ ուղիղ են սրտիւք:

12. Աստուած դատաւոր արդար հզաւր եւ երկայնամիտ. որ ոչ ածէ զբարկութիւն իւր զաւրհանապազ:

13. Ապա թէ ոչ դառնայք առ նա` զսուր իւր սրեալ է` եւ զաղեղն իւր լարեալ.

14. ի նմա է պատրաստեալ զանաւթս մահու, եւ զնետս իւր այրեցելովք է գործեալ:

15. Ահաւասիկ երկնեաց զանաւրէնութիւն, յղացաւ զցաւս եւ ծնաւ զանաւրէնութիւն:

16. Գուբն` զոր փորեաց եւ պեղեաց, ի նոյն անկցի ի խորխորատ զոր եւ գործեաց:

17. Դարձցին ցաւք ի գլուխ նորա. ի վերայ գագաթան նորան անաւրէնութիւնք իւր իջցեն:

18 Խոստովան եղէց Տեառն ըստ արդարութեան նորա, սաղմոս ասացից անուան Տեառն բարձրելոյ: Տունք. ժէ: