1. Ի կատարած ընդ աւրհնութիւնս. մի ապականեր. Սաղմոս յԱսափ. երգ առ Ասորեստանեայս. ՀԵ:
2. Յայտնի է ի Հրէաստանի Աստուած, եւ յԻսրայէլ մէծ է անուն նորա:
3. Եղեւ խաղաղութիւն տեղի նորա, եւ բնակութիւն նորա Սիովն:
4. Անդ խորտակեաց Տէր զզաւրութիւն աղեղան, զզէն զսուր եւ զճակատամարտ:
5. Լուսատու ես դու սքանչելապէս լերանցն յաւիտենից.
6. խռովեսցին ամենեքեան որ անմիտ են սրտիւք, ննջեցին զքունս իւրեանց եւ ոչ ինչ գտին: Ամենայն արք ի մեծութեան ձեռաց իւրեանց.
7. ի սաստէ քումմէ Աստուած Յակոբայ ննջեցին, եւ ոյք հեծեալ էին ի ձիս:
8. Դու ահաւոր ես եւ ո՞վ կարէ կալ առաջի քո.
9. որպէս երեւեցար դու յերկնից, յայտնի եղեւ բարկութիւն քո: Երկիր երկեաւ եւ սարսեաց
10. ընդ յառնելն Աստուծոյ ի դատաստան. ընդ ապրեցուցանել զամենայն հեզս երկրի:
11. Խորհուրդք մարդկան խոստովան առնին առ քեզ, եւ ծածկեալք իմաստութեամբ աւրհնեսցեն զքեզ:
12. Ուխտս դիք եւ կատարեցէք Տեառն Աստուծոյ մերոյ, ամենեքեան ոյք շուրջ էք զնովաւ: Մատուցէք պատարագս ահաւորին.
13. ո քաղէ զհոգիս իշխանաց, ահաւոր է նա քան զամենայն թագաւորս երկրի: Տունք. ժ:
Հաղորդում կայքում սխալի վերաբերյալ
Տվյալ հատվածում առկա է սխալ: