Գլուխ 79

   
1. Ի կատարած. ի վերայ զառանցելոցն վկայութիւնս. ասացեալ Սաղմոս ի վերայ եթւովպացւոցն. ՀԹ:

2. Ո հովուեսդ Իսրայէլի նայեաց, որ առաջնորդես որպէս խաշին Յովսեփու: Որ նստիսդ ի քրովբէս յայտնեա

3. առաջի Եփրեմի Բենիամինի եւ Մանասէի: Զարթո զզաւրութիւն քո, եւ եկ կեցուցանել զմեզ:

4. Աստուած զաւրութեանց դարձո զմեզ, երեւեցո զերեսս քո ի մեզ եւ կեցցուք:

5. Տէր Աստուած զաւրութեանց մինչչեւ յե՞րբ բարկանաս յաղաւթս ծառայից քոց:

6. Ջամբեցեր մեզ հաց արտասուաց, եւ արբուցեր մեզ արտասուս չափով:

7. Արարեր զմեզ նախատինս դրացեաց մերոց, այպն կատականաց թշնամեաց մերոց:

8. Աստուած զաւրութեանց դարձո զմեզ, երեւեցո զերեսս քո ի մեզ եւ կեցցուք:

9. Այդի յԵգիպտոսէ փոխեցեր. հաներ զհեթանոսս եւ զնոսա տնկեցեր,

10. եւ առաջնորդեցեր նմա: Հաստատեցեր զարմատս նորա եւ ելից զերկիր.

11. ծածկեաց զլերինս հովանի նորա, եւ բարունակք նորա զմայր Աստուծոյ:

12. Ձգեաց զորթ իւր մինչչեւ ի ծով, մինչչեւ ի գետս են շառաւեղք նորա:

13. Ընդէ՞ր քակեցեր զցանգ նորա, կթեն զնա անցաւորք ճանապարհի:

14. Ապականեաց զնա խոզ անտառի, եւ երէ վայրի արածեցաւ ի նմա:

15. Աստուած զաւրութեանց դարձ հայեաց յերկնից եւ տես, այց արա այգւոյս այսմիկ

16. եւ դարման տար սմա զոր տնկեաց աջ քո: Ի վերայ որդւոյ մարդոյ զոր զաւրացուցեր զնա ի քեզ,

17. այրեցեալ ի հուր, աւերեալ, եւ ի սաստէ քումմէ կորիցէ:

18. Եղիցի ձեռն քո ի վերայ առն, աջ քո ի վերայ որդւոյ մարդոյ զոր զաւրացուցեր զնա ի քեզ:

19. Ոչ եւս ի բացէ եղիցուք մեք ի քէն. կեցուսցես դու զմեզ, եւ զանուն քո Տէր կարդասցուք:

20. Աստուած զաւրութեանց դարձո զմեզ, երեւեցո զերեսս քո ի մեզ եւ կեցցուք: Տունք. ժը: