Գլուխ 19

 
1․ Ի կատարած. Սաղմոս ի Դաւիթ. ԺԹ:

2․ Լուիցէ քեզ Տէր յաւուր անձկութեան, աւգնական եղիցի քեզ անուն Աստուծոյ Յակովբայ:

3․ Առաքեսցէ քեզ Տէր աւգնութիւն ի սրբութենէ իւրմէ ի Սիովնէ, եւ ընկալցի զքեզ:

4․ Յիշեսցէ Տէր զամենայն պատարագս քո, եւ զուխտս քո ընդունելի արասցէ:

5․ Տացէ քեզ Տէր ըստ սրտի քում, եւ զամենայն խորհուրդս քո նա կատարեսցէ:

6․ Ցնծասցուք մեք ի փրկութեան քում, յանուն Աստուծոյ մերոյ մեք մեծք եղիցուք:

7․ Լցուսցէ Տէր զամենայն խնդրուածս քո. այժմ ծանեաք` զի կեցոյց Տէր զաւծեալ իւր: Լուաւ սմա յերկնից ի սրբութենէ իւրմէ, ի զաւրութիւն փրկութեան աջոյ իւրոյ:

8․ Սոքա կառաւք եւ սոքա երիվարաւք, այլ մեք զանուն Տեառն Աստուծոյ մերոյ կարդասցուք:

9․ Սոքա խափանեցան եւ անկան, մեք յարեաք եւ ուղիղք եղաք:

10․ Տէր կեցո զթագաւորն եւ լուր մեզ, յաւուր յորում կարդասցուք առ քեզ: Տունք. ժ