Գլուխ 45

   
1. Ի կատարած. որդւոցն Կորխայ ի վերայ գաղտնեաց. ԽԵ:

2. Աստուած մեր ապաւէն եւ զաւրութիւն. աւգնական ի վերայ նեղութեանց որ գտին զմեզ յոյժ:

3. Վասն այսորիկ ոչ երկիցուք մեք ի խռովել երկրի, ի փոփոխել լերանց ի սիրտ ծովու:

4. Գոչեցին եւ խռովեցան ջուրք նոցա, խռովեցան լերինք ի զաւրութենէ նորա:

5. Գնացք գետոց ուրախ առնեն զքաղաքն Աստուծոյ, եւ սուրբ արար զյարկս իւր բարձրեալն:

6. Աստուած ի մէջ նոցա եւ նոքա մի սասանեսցին. աւգնեսցէ նոցա Աստուած ի վաղորդայնէ մինչ ի վաղորդայն:

7. Խռովեցան հեթանոսք, եւ խոնարհ եղեն թագաւորութիւնք. ետ զձայն իւր բարձրեալն` եւ խռովեցաւ երկիր:

8. Տէր զաւրութեանց ընդ մեզ, ընդունելի է մեր Աստուած Յակովբայ:

9. Եկայք եւ տեսէք զգործս Աստուծոյ, որ արար զնշանս եւ զարուեստս ի վերայ երկրի:

10. Եհար զպատերազմ ի ծագաց մինչ ի ծագս երկրի. զաղեղունս փշրեաց, զզէնս խորտակեաց եւ զասպարս այրեաց հրով:

11. Կանխեցէք եւ ծաներուք զի ես եմ Աստուած. բարձր եղէց ի հեթանոսս, եւ բարձրացայց ի վերայ երկրի:

12. Տէր զաւրութեանց ընդ մեզ, ընդունելի է մեր Աստուած Յակովբայ: Տունք. ժա. Գոբղայս. ծզ: