Գլուխ 136

Ի Դաւիթ. ի ձեռն Երեմիայի. աննշան յեբրայեցւոցն. ՃԼԶ:
   

1․ Ի գետս բաբելացւոց, անդ նստէաք եւ լայաք. որպէս յիշեցաք մեք անդ զՍիովն:

2․ Ի մէջ ուռեաց նոցա կախեցաք զկտակարանս մեր:

3․ Անդ հարցանէին գերիչք մեր զբանս աւրհնութեան, գերեվարք մեր ստիպէին զմեզ եւ ասէին: Աւրհնեցէք մեզ յաւրհնութենէն Սիոնի.

4․ իսկ` զիա՞րդ աւրհնեսցուք զաւրհնութիւնս Տեառն յերկիր աւտար:

5․ Եթէ մոռացայց զքեզ Երուսաղէմ, մոռասցի զիս աջ իմ:

6․ Կցեսցի լեզու իմ ի քիմս իմ թէ ոչ յիշեցից զքեզ, թէ ոչ նախ նուագեցից զքեզ Երուսաղէմ, սկիզբն ուրախութեան իմոյ:

7․ Յիշեա Տէր զորդիսն Եդովմայ` յաւուրս Երուսաղէմի: Ոյք ասէին` քակեցէք քակեցէք, մինչչեւ ի հիմն հասուցէք:

8․ Դուստր բաբելացւոց թշուառական, երանի որ հատոյց զհատուցումն քո զոր դու մեզ հատուցեր:

9․ Երանի որ կալաւ զմանկունս քո, եւ հար զքարի: Տունք. ժ: