Գլուխ 146

Ալէլուիա. Անգեայ եւ Զաքարիայ. ՃԽԶ:

 

1․ Աւրհնեցէք զՏէր` զի բարի է. սաղմոսք Աստուծոյ մերում քաղցրասցի աւրհնութիւն:

2․ Շինէ զԵրուսաղէմ Տէր, եւ զցրուեալսն Իսրայէլի ժողովէ:

3․ Բժշկէ զբեկեալ սիրտս, եւ պատէ զամենայն վէրս նոցա:

4․ Թուէ զբազմութիւն աստեղաց, եւ զամենեսեան զնոսա յանուանէ կոչէ:

5․ Մեծ է Տէր մեր եւ մեծ է զաւրութիւն նորա, իմաստութեան նորա ոչ գոյ բաւ:

6․ Ընդունի զհեզս Տէր, եւ խոնարհ առնէ զամբարտաւանս մինչչեւ յերկիր:

7․ Աւրհնեցէք զՏէր խոստովանութեամբ, սաղմոս ասացէք նմա աւրհնութեամբ:

8․ Զգեցոյց զերկինս ամպովք, պատրաստ արար զանձրեւ իւր յերկիր: Բուսոյց զխոտ ի լերինս, զդալարի ծառայութիւն մարդկան:

9․ Այն որ տայ անասնոց զկերակուր իւրեանց. ձագաց ագռաւուց որ կարդան առ նա:

10․ Ոչ թէ ընդ զաւրութիւնս ձիոյ կամեցաւ Տէր, եւ ոչ ընդ երանս առն սկայի հաճեցաւ:

11․ Այլ հաճեցաւ Տէր յերկիւղածս իւր, եւ ընդ այնոսիկ ոյք յուսան յողորմութիւն նորա: Տունք. ժբ: