Գլուխ 111

Ալէլուիա. ի վերայ ապաշխարութեան, Անգեայ եւ Զաքարիայ. ՃԺԱ:

   

1․ Երանեալ է այր որ երկնչի ի Տեառնէ, զի զպատուիրանս նորա նա կամի յոյժ:

2․ Հզաւր եղիցի յերկրի զաւակ նորա, եւ ազգ ուղղոց աւրհնեսցի:

3․ Փառք եւ մեծութիւն են ի տան նորա, արդարութիւն նորա մնայ յաւիտեանս յաւիտենից:

4․ Ծագեաց ի խաւարի լոյս ուղղոց, ողորմած գթած եւ արդար է Տէր:

5․ Քաղցր այր ողորմի եւ տայ փոխ, յաւրինէ զբան իւր ի դատաստանի,

6․ զի յաւիտեան նա մի սասանեսցի:

7․ Յիշատակ յաւիտենից եղիցի արդար, ի համբաւէ չարէ նա մի երկիցէ: Պատրաստ է սիրտ նորա յուսալ առ Աստուած:

8․ Հաստատեալ է սիրտ նորա եւ նա մի երկիցէ, մինչչեւ տեսցէ ի թշնամիս իւր:

9․ Սփռեաց եւ ետ աղքատաց. արդարութիւն նորա մնայ յաւիտեանս յաւիտենից, եւ եղջեւր նորա բարձր եղիցի փառաւք:

10․ Մեղաւորն տեսցէ եւ բարկասցի, զատամունս իւր կրճտեսցէ եւ հալեսցի, եւ ցանկութիւն մեղաւորաց կորիցէ: Տունք. ժ: